عرض مشاركة واحدة
قديم 08-29-2010, 09:51 PM   #1237
خبيــر بأسـواق المــال
كاتب الموضوع : محمد على باشا المنتدى : التحليل الفنى والمالى و المتابعة اللحظية قديم بتاريخ : 08-29-2010 الساعة : 09:51 PM
افتراضي رد: الأسهم النارية فى البورصة المصرية

قصتى مع البورصة ..2

واتحدث فيها عن تجربتى مع شركات السمسرة فى بورصتنا المحروسة ...

أغلب شركات السمسرة انت فى عنيها ...وانت

الباشا ...والبرنس ...والخديو ...طالما بتنفذ كتير ومحفظتك بخير

وانت بتشترى بالكريديت تلاقى التريدر يقولك ومالو ياباشا ...نشترى ...

ولما السهم يقع ...ييجى واكنه خجلان منك ...ويقولك بهمس كده ...ياباشا لازم نقفل الكريديت ...احسن ديه تقفيلة الاسبوع ..او تقفيلة الشهر ...المهم لازم نبيع ...تبص ليه وانت مدبوح ومش عارف تعمل ايه ...
بس انا كده هاخسر ...يقولك ياباشا ماتقلقشى ...انا هاجيبهوملك تانى ...
المهم يرجعهلمك بسعر عالى تانى يوم ...والسهم يستكمل رحلته الهبوطية ...وترجع لنفس السيناريو ...احنا لازم نقفل ...وتدخل الدوامة ....

ثم يأتى بعد ذلك ...الأونطجى ...وده لازم تلاقيه فى كل شركة سمسرة ..ده واحد من الشركة قد يكون موظفا فيها او عميل ...وتلاقيه عامل انه عارف كل الجيمات اللى هاتحصل ...بس بيقول بعدها ...اى سهم يطلع يقولك انا كنت عارف انه طالع بس ماينفعشى انى اقول ...

المهم انت عاوز تعوض ...تقوم تاخده كده على جمب ...وتهمس ليه ...طيب ياباشا ايه رأيك ادخل ايه ...يقعد يتفلسف شوية لزوم سبك الدور ...ثم يهمس ليك وكأنه بيعطيك سر القنبلة الهيدروجينية ...اشترى سهم كذا ...طبعا انت هاتكون طاير من الفرحة ...وتهلل الفرحة وجهك ...وتشعر انك خلاص هاتعوض ...ثم يعاجلك بقوله بس اوعى تقول لحد ...وانت تقوله عيب ...وهو عارف انك هاتقول للدنيا كلها ...وتكتشف بعد ذلك ان صاحبنا مزنوق فى السهم بقاله فترة ...

لقد مررت بتلك التجربة وخسرت فيها والحمد لله ...بس تعلمت ...

المهم انى اكتشفت الحكاية بالصدفة ...كان معى محافظ مالية كبيرة وقررت انى اشترى سهم معين واحتفظ به لوقت ...لأن عليه خبر ...
ودخلت فيه بعض اصدقائى المقربين ...وقلت ليهم مش هانبيع ...احنا هانحتفظ ...قالولى ماشى ...واصبحت لنا نسبة كبيرة فى السهم ..ومش فى بالنا خالص اننا نحركه او نعمل فيها ميكرات ...
المهم جه صاحبنا الأونطجى ...ولقيته بيتكلم عن اكتر من سهم كعادته ...فقلت ليه وكأنى مش عارف حاجة ...وسعادتك ايه رأيك فى سهم كذا ...وكان هو السهم اللى العبد لله مجمع فيه كمية ...وفؤجئت به بيقولى بص ...انا هاقولك على سر خطير ...قلتله قووول يامعلم ...قالى بصراحة السهم ده فى ناس من الفيوم والمنيا عمالين يلموا فيه ...طبعا بينت انى عثرت على سر خطير ...
وقلتله تفتكر هما ناويين يحركوه امتى ...فرد مبتسما ...وقالى مش قبل 6 شهور ...

طبعا السهم اتحرك بعد كلامه ب 6 ايام فقط ...وكنت كل مااضع فيشة شراء ...الاقيه شفت بتوع الفيوم عملوا ايه ...اقوله اه شفت ...دول ولاد .....
طبعا اكتشفت من هذه القصة ...ان اغلب الناس بتردد اى كلام ...
.وقليل جدا من يعرف الميكر ...او من يحرك السهم ...

ابو عريف شركات السمسرة او الأونطجى ...قد يضيع بسببه الكثيرون ...اصحاب الخبرة القليلة فى اسواق المال

ثم قابلت بعد ذلك ...احد مديرى الاستثمار ....المهم صاحبته وقلت ده اكيد فلتة زمانه ...قعد يقولى احنا اشترينا السهم الفلانى بسعر كذا ...وهو ادنى سعر للسهم ...وبيعنا بأعلى سعر للسهم ...

طبعا انا طيب وصدقته ...المهم كانت هناك معلومة على احدى الأسهم ورحت داخله فى محفظتى ...وبفضل الله كان فى ادنى سعر ليه فى الجلسة ..ثم صعد السهم لأكثر من جلسة ...ثم بعته وكان بالقرب من اعلى سعر والحمد لله وكانت جت معايا صدفة ...ثم هبط السهم بعد ذلك ...حمدت ربنا وقلت اهى حاجة تعوض ...قابلت صاحبنا ...وقلت ليه ايه رأيك فى السهم ...لقيته قالى على اسعار شرائى وبيعى على انه اشترى وباع على ذات الاسعار وبكميات غريبة اكبر من اللى نفذها السهم على تلك الأسعار ...لأنى كنت بكتب التنفيذات بكمياتها ...واكتشفت انه فشار ...ههههههه ...وضحكت كثيرا ...لأنى اكتشفت ان الكل يحب ان يلمع نفسه ...وان الكل خسران ...ومش فاهم حاجة ....هههههههههه ...كلنا فى الهوا سوا
الموضوع الأصلى من هنا: مجموعة البورصة المصرية http://www.BORSAEGYPT.com/showthread.php?p=1059850229

المهم نرجع لشركات السمسرة ...هتلاقى السماسرة يعرفوا مثلا انك عندك معلومة ...تلاقى الاسهم اللى انت بتشتريها اغلب الشركة شارياها ...حدث ذلك مع اسهم كثيرة مع العبد لله
..وطبعا انا بدخل الاسهم قليلة السيولة ...عدد اسهمها قليل ...علشان كده لما يحصل تداول غير عادى ..بيكون ملحوظ جدا ...وبيقرر الميكر عقاب من دخلوا السهم وبيقف السهم مدة علشان اللى دخل فى السهم يخرج ويزهق ...وبالفعل اغلب الناس بتزهق وتبيع ...طبعا العبد لله بيكون خسر وقت فى السهم ..
الموضوع الأصلى من هنا: مجموعة البورصة المصرية http://www.BORSAEGYPT.com/showthread.php?p=1059850229
المهم انى اكتشفت الحكاية ديه بالصدفة ....من كشوف حسابات العملاء ...والتى وقعت معى بالمصادفة ..كنت بطبع كشف حساب خاص بى ...ومسكت كشوف حسابات لشخصين تلاتة معاهم نفس السهم اللى اشتريته ....والعجيب فى الأمر انهم اشتروا قبل منى ...وبأسعار اقل ...طبعا السمسار دخل حبايبه وبعد كده دخلنى ...ويقولى معلشى ياباشا ...السهم جرى ...وطبعا الواحد عاوز يشترى ...اتارى ياخويا ان الناس اللى فى الشركة بتشترى قبل منى ....هههههههههه ....
الموضوع الأصلى من هنا: مجموعة البورصة المصرية http://www.BORSAEGYPT.com/showthread.php?p=1059850229

وطبعا كان يحدث هذا فى البيع ايضا ...والحكاية ديه حصلت اكتر من مرة ...بس الحمد لله انى اكتشفتها ....وتعلمت من ذلك ان اتابع التنفيذ بأهمية اكثر ...وان يكون سريعا والا لغيت الاوردر ....

بينى وبينكم الموضوع تعبنى ...وقلت لازم يكون فيه رد منى .....بلغت السمسار انى عاوز اشترى سهم كذا ..وطبعا سعادته اشترى لكام واحد قبلى ....رحت قلتله ...بعد ماشفت التنفيذات ...قلتله خلاص ماتشتريش حاجة ...قالى ليه ...قلتله ابدا ...بس ممكن يكون فيه سهم احسن ...هههههههه ...وبالفعل اشتريت براحتى فى ذلك اليوم لأن الشركة كلها كانت متكومة فى السهم الأولانى والذى صعد على التسوية 5 فى المية بينما صعد السهم الذى دخلته اكثر من 30فى المية ..... ارزاق

المهم واحد صاحبى وحبيبى فى شركة سمسرة كنت شارى فيها اسهم ...قالى ياباشا انت مش فاضى تدير الاسهم ديه وبصراحة انا عاوز اعملك تريدات ...قلتله ماتسيب الاسهم ...انا مش غاوى تريدات ...قالى لأ ...ده احلى شغل ...امضى لى على اوردرات على بياض وانا هاظبطك ..وبالفعل مضيت له على الاوردرات ...وبعد ثلاثة اشهر لقيته بيتصل بيا ...بيقولى المحفظة بتاعتك فلست وبقى عليها فلوس ...هههههههه....قلت له مفيش مشكلة ...قالى لأ ازاى الشركة عاوزة فلوس ...قلتله طيب سيبنى اشترى كام سهم وسيبهم اسبوعين وهايرجعوا بعض الفلوس ويسددوا ...قالى ماشى ...اشترى ليا ...واول ما السهم جاب فلوس الشركة باع ليا واتصل بيا فرحان
..الحمد لله سددنا فلوس الشركة ...هههههههههه....فعلا ظبطنى

وتعلمت من هذا الدرس الا امضى اوردرات على بياض لأى شركة سمسرة ...

فى شركات السمسرة اغلب العملاء ...الكل يشعر فى قرارة نفسه انه عبقرى البورصة ...بس الدنيا مش مساعدة

فى شركات السمسرة لو قلت لأحد عشرة اسهم وصعدت وعملت طفرات ...ده عادى ومش هايفتكره ابدا ليك

اما لو سهم واحد هبط ...هايفتكره ليك ...ويفضل كل لما يشوفك ...يقولك فاكر ياريس السهم الفلانى ...

فى شركات السمسرة لا احد يشكر فى احد ...هذا امر واقع ...

ولقد استفدت من ذلك ان اصمت فى شركات السمسرة ...ولا اتحدث عن اسهم ...فى شركات السمسرة التزم الصمت ولا تتحدث مع احد

فى شركات السمسرة لا تعرف احدا انت اشتريت اسهم ايه ...واكتب للتريدر ورقة بالسهم وسعره واذا كان شراء ولا بيع ...وخلى التريدر يعطى الورقة للسمسار ...او اذا كان هايبلغه يكون بشويش ودون ان يسمعه احد ....هذا ما تعلمته ...ليه كل ده ...لأنك لو معرف الناس بأسهمك هتلاقى شوشرة على تفكيرك غير طبيعية ...السهم يطلع هتلاقى كل واحد اللى يقولك بيع ...واللى يقولك اعمل تريدة ياباشا ...

اعمل فى صمت ياصديقى ...........

 


اخبار مصر - الذهب - تحويل العملات
فوركس - تجارة فوركس
توقيع

أَعْلمُ أني لا أعْلمُ شيئا

سقراط

محمد على باشا غير متواجد حالياً

 

رد مع اقتباس